Heitt vatn hækkað um 43 prósent

Fulltrúar minnihlutans í framkvæmda- og veitustjórn Árborgar mótmæltu harðlega þegar ákveðið var á fundi stjórnarinnar að hækka verð á heitu vatni frá Selfossveitum um 5 prósent.

„Ef þessi tillaga verður samþykkt hefur verð á heitu vatni í sveitarfélaginu hækkað um rúm 43 prósent á kjörtímabilinu sem er langt umfram launaþróun helstu launþegahópa,“ bókuðu fulltrúar minnihlutans. „Er þessi aukna hækkun ekkert annað en illa dulin skattahækkun.“

Fulltrúar meirihluta Sjálfstæðisflokks sögðu forsendur hafa breyst. „Það er skylda okkar sem kjörinna fulltrúa að reka veiturnar ekki með tapi,“ bókuðu þeir.