Vælið í Versló toppar lokakeppnina

„Þetta er í annað sinn sem við höldum Vælið í Eldborg en til stóð að halda keppnina í Háskólabíói, en það er bara of lítið fyrir okkur og hýsir ekki alla nemendur skólans,“ segir Helga Hauksdóttir, fjármálastjóri skemmtinefndar Versló, um söngvakeppni skólans.

Athyglisvert er að sjá að Verzlunarskóli Íslands heldur söngvakeppnina sína í stærsta og fullkomnasta tónleikasal landsins og mætti þá segja að skólinn sé að setja pressu á þá aðila sem standa að lokakeppninni. „Okkur finnst það frábært að Versló skuli halda keppnina í Eldborg. Við gerum hins vegar það sem heildin vill og flestir nemendur innan SÍF vilja að lokakeppnin verði á Akureyri,“ segir Laufey María Jóhannsdóttir, formaður Sambands íslenskra framhaldsskólanema, um málið.

Yfirleitt fer lokakeppnin fram í íþróttahöllinni á Akureyri en það er enn óljóst hvar hún fer fram á næsta ári. „Það setur auðvitað pressu á okkur að halda betri og stærri keppni en oft er það ekki hægt. Yfirleitt er meiri stemning í skólunum fyrir forkeppnunum en við gerum okkar besta til að hafa lokakeppnina sem flottasta,“ bætir Laufey María við.

Eins og fyrr segir fór Vælið fram í Eldborg í fyrra og kom því lítið annað til greina en að hafa keppnina þar aftur. „Það var kosningaloforð stjórnarinnar að halda keppnina í Eldborg. Síðasta keppni var glæsileg en við ætlum að reyna gera enn betur í kvöld. Við erum samt ekkert eini skólinn sem hefur verið með keppnina í Hörpu því Menntaskólinn við Sund og fleiri skólar hafa verið í litla salnum í Hörpu, sem heitir að ég held Silfurberg,“ segir Helga létt í lundu.

Vælið fer fram á föstudagskvöld og hefst klukkan 19.30 og miðasala er á midi.is.