Atvinnurekendur vilja færa frídaga en stéttarfélög hugsi

 Samiðn leggur til að frídagafrumvarp Bjartrar framtíðar verði samþykkt og verði að lögum eins og það er lagt fram.

BSRB og Starfsgreinasambandið telja að 1. maí sé svo helgur dagur fyrir verkafólk að ekki komi til greina að hrófla við honum. Þetta kemur fram í umsögnum um frídagafrumvarp Bjartrar framtíðar sem liggur fyrir Alþingi.

Rafiðnaðarsambandið er hins vegar á því að það megi taka 1. maí til endurskoðunar. „Það er engin að ræða um að fella 1. maí niður, það er sáralítið hlutfall launamanna sem tekur þátt í hátíðahöldunum og hægur vandi að koma þeim fyrir eftir sem áður í lok vinnudags,“ segja rafiðnaðarmenn og eru frekar jákvæðir gagnvart frumvarpinu í heild. BSRB gerir ekki athugasendur nema við tilfærslu 1. maí.

Í umsögn Starfgreinasambandsins má greina vafa. Annars vegar eru kynnt sjónarmið þeirra sem vilja fara þá leið sem kynnt er í frumvarðinu og hins vegar þeirra sem engu vilja breyta.

Landssamband eldri borgara telur að sú hefð sem skapast hefur um sumardaginn fyrsta og uppstigningardag, eigi sér sterkar rætur í íslenskri þjóðmenningu og ekki eigi að breyta því með einfaldri lagasetningu.

Samtök atvinnulífsins vilja færa frí vegna uppstigningardags og sumardagsins fyrsta upp að næstu helgi en lýsa andstöðu við fjölgun frídaga sem lögð er til í frumvarpinu.

Félag atvinnurekenda telur frumvarpið að hluta til ágætt en gerir athugasemdir við aukinn kostnað atvinnurekenda yrði það að lögum.

Viðskiptaráð lýsir sömu skoðun og á svipuðum nótum eru athugasemdir Sambands íslenskra sveitarfélaga. „Frídagar eru hluti af vinnutímaákvæðum kjarasamninga og hafa breytingar á þeim áhrif á launakostnað sveitarfélaga,“ segir í umsögninni.