„Hann ætti að fá að njóta vafans“

„Ef hann er þátttakandi í mansalsmáli á Íslandi þá er óeðlilegt að henda manninum úr landi áður en rannsókn málsins er lokið,“ segir Stefán Karl Kristjánsson, lögmaður nígeríska hælisleitandans sem átti að vísa úr landi í fyrradag og lögreglan leitar enn að.

Maðurinn er grunaður um aðild að mansalsmáli sem átti sér stað fyrir fjórtán mánuðum en maðurinn hefur dvalist á Íslandi í tvö ár.

„Hann lá undir grun á síðasta ári og var yfirheyrður en ekki hefur enn verið lögð fram ákæra. Málið er í biðstöðu, það hefur ekkert gerst í því í rúmt ár. Maðurinn ætti að fá að dvelja á landinu á meðan málið er leitt til lykta en hann hefur alltaf haldið fram sakleysi sínu,“ segir Stefán Karl.

Í rökstuðningi innanríkisráðuneytisins fyrir brottvísun mannsins kemur fram að ætluð barnsmóðir hans, sem einnig er hælisleitandi frá Nígeríu, beri við að hún sé mansalsfórnarlamb. Konan kom til Íslands ásamt átta öðrum konum fyrir einu og hálfu ári. og grunur leiki á að hún sé beitt þrýstingi um að segja manninn vera föðurinn. Af þessu gefnu þyki ekki sannað að maðurinn hafi fjölskyldutengsl á Íslandi.

„Það liggja fyrir í málinu ákveðnar vísbendingar um fjölskyldutengsl. Á meðan svo er og á meðan hælismál hans er rekið fyrir Héraðsdómi, þá ætti maðurinn að fá að njóta vafans eins og hefðin er í íslensku dómskerfi,“ segir Stefán Karl.

Í gær var mótmælt við innanríkisráðuneytið vegna máls mannsins.