Stevie Wonder með tvær nýjar plötur

Bandaríski tónlistarmaðurinn Stevie Wonder staðfesti í samtali við The Independent, að tvær plötur væru væntanlegar frá honum á næsta ári. Wonder sem er orðinn 63 ára gamall, hefur ekki gefið út plötu í átta ár en nýju plöturnar munu heita When the World Began og Ten Billion Hearts.

Einn ástsælasti upptökustjóri samtímans, David Foster mun stýra upptökum á plötunni When the World Began en hann er þekktur fyrir störf sín með Michael Bublé, Christina Aguilera og Beyoncé, svo einhverjir séu nefndir.

Wonder sagðist ætla breyta mikið til á næstu plötum og jafnvel að syngja gospel á arabísku eða jafnvel hebresku. Þá sagðist hann hafa hlustað mikið á rapptónlist undanfarið en fyrr á árinu hafði hann tjáð sig um að nýja efnið yrði flutt af sinfóníuhljómsveit. Það eru því eflaust margir sem bíða spenntir eftir nýja efni þessa margverðlaunaða listamanns.