Á milli þess að vera lúxus og helvíti

„Um helgina ætla ég að kreista síðustu dropana úr sjálfspyntingartankinum,“ segir Berglind Pétursdóttir, danshöfundur og GIF-drottning, sem hefur tekið þátt í Meistaramánuði það sem af er október.

„Ég er búin að vera fáránlega dugleg í þessum mánuði, til dæmis með því að borða eins og hellisbúi á Paleo-mataræði. Ég hef ekki fengið mér eitt einasta Kit-Kat í margar vikur og hef heldur ekki snert áfengi,“ segir Berglind jafnframt.

„Þetta er svona mitt á milli þess að vera lúxus og að vera hreinlega í helvíti,“ bætir Berglind við, en hún hefur mætt í ræktina á hverjum degi, oft tvisvar, að eigin sögn.

„Um helgina er á markmiðalistanum að þrífa alla íbúðina, hátt og lágt og svo ætla ég að halda áfram að haga mér eins og sá meistari sem ég er orðin,“ segir Berglind.

„Ég get samt ekki beðið eftir að þessum mánuði ljúki. Ég hlakka brjálæðislega til Airwaves og ætla að bregða undir mig betri fætinum og vera dugleg að stunda hátíðina í ár,“ bætir hún við að lokum.