Líkir Makrílgengd við engisprettufaraldur

 „Þetta minnir að vissu leyti á engisprettufaraldur í Biblíunni.“ Þetta segir Arthur Bogason, formaður Landssambands smábátaeigenda, um aukningu á makrílgengd hér við land síðustu ár.

Handfærabátar komu með 4.668 tonn af makríl að landi í sumar og hefur magnið aldrei verið meira. Hann segir smábátasjómenn kalla eftir frjálsum handfæraveiðum á makríl, enda muni það ekki hafa teljandi áhrif á afkomu stofnsins.

„Kóngar eða faraóar hafa aldrei bannað fólki að drepa engisprettur vegna þess að annað land vildi halda upp á stofninn sinn. Frekar á að siga mönnum á makrílinn því hann mun klárlega raska því jafnvægi sem hefur ríkt hérna við Ísland.“

Arthur segir að svæðisfélög smábátasjómanna hafi síðustu vikur allflest ályktað um frjálsar handfæraveiðar á makríl.„Þetta eru litlar stærðir en þær skipta mannskapinn og litlu byggðarlögin miklu máli og hafa lítið með það að gera hvort makrílstofninn lifi eða deyji.“

Arthur segir margt brenna á meðlimum sambandsins, til dæmis hafi menn áhyggjur af því hvernig ráðgjöf Hafrannsóknarstofnunar Íslands til sjávarútvegsráðherra stangist á við reynslu manna á miðunum.

„Ekki bara með magn, heldur líka með samsetningu afla. Víða eru menn í standandi vandræðum vegna ýsu, sem á ekki að vera til samkvæmt gögnum Hafró. Að skora á stjórnvöld að auka ýsuheimildirnar hefur verið mikið í umræðunni. Veiðigjöldin brenna líka á mönnum, sem koma sérdeilis illa við meðalstórar og smáar útgerðir,“ segir Arthur.

Hann segir einnig að vilji sé fyrir því að strandveiðimönnum verði gert kleift að róa fjóra daga í viku yfir sumartímann og jafnvel að hægt verði að velja mánuði úr ákveðnu tímabili til veiðanna.samuel@frettabladid.is