Fjöldi á starfakynningu Norðmanna

„Það er stöðug eftirspurn í Noregi eftir fólki með sérfræðikunnáttu í öllum geirum atvinnulífsins. Við höfum hins vegar nóg af ófaglærðum starfskrafti. Margt ungt fólk sem hefur flosnað upp úr námi vantar vinnu og einnig ófaglærða útlendinga sem búsettir eru í Noregi,“ sagði Hallgeir Jenssen, fulltrúi norsku Vinnumálastofnunarinnar og EURES-samstarfsins, við Fréttablaðið á starfakynningu á Grand Hóteli í Reykjavík í gær. Þar kynntu EURES, samstarf um vinnumiðlun á evrópska efnahagssvæðinu, og norsk fyrirtæki starfsmöguleika í Noregi. Leitað er meðal annars að iðnaðarmönnum, heilbrigðisstarfsfólki, verkfræðingum og starfsmönnum úr veitingageiranum og sjávarútvegi.

Norðmenn eru ánægðir með vinnusiðferði Íslendinga og meðal annars þess vegna hafi norsk fyrirtæki áhuga á að fá Íslendinga í vinnu, að sögn Jenssen. „Það er margt líkt með íslensku og norsku samfélagi. Íslendingar skilja að þeir verða að láta til sín taka og að menn geti ekki vænst þess að samfélagið geri allt fyrir þá,“ sagði hann. 

Þröng var á þingi á kynningunni í gær og biðu menn í röðum eftir því að fá að ræða við fulltrúa þeirra níu fyrirtækja og vinnumiðlana sem voru á staðnum. Sumir Íslendinganna, sem voru á öllum aldri, virtust eftirvæntingarfullir en aðrir frekar þungir á brún. Starfakynningin í gær var sú sjöunda sem EURES hefur staðið fyrir hér á landi, að sögn Jenssen. „Það hafa komið um 300 manns á hverja af þessum stuttu kynningum hjá okkur,“ greindi hann frá en kynningin í gær stóð yfir í sex klukkustundir.

Í fyrra fluttu 1.395 íslenskir ríkisborgarar til Noregs en 1.539 árið 2011.

Framtíðin er ekki björt á Íslandi

Albert Ísleifsson, sem er 21 árs, missti vinnuna í þessari viku og dreif sig þess vegna á starfakynningu Norðmanna. „Það er ekki björt framtíð hér. Ég er kominn á götuna.“

Albert hefur starfað við hellulagningar frá því að hann var 14 ára og vonast til þess að fá starf í Noregi. „Þeir eru að auglýsa eftir hellulagningarmönnum,“ segir hann.

Ætlar að flytja til að fá betri laun

Jórunn Sóley Björnsdóttir sjúkraliði stefnir að því að flytja til Noregs og starfa þar við sitt fag. Hún var á meðal fjölmargra heilbrigðisstarfsmanna sem sóttu kynningu norskra vinnumiðlana og fyrirtækja á Grand Hóteli í Reykjavík í gær.

„Ég sækist eftir betri launum. Þar er líka hugsað betur um starfsmenn. En ég er að vísu sátt á hjúkrunarheimilinu Sóltúni þar sem ég vinn.“

Jórunn Sóley gæti hugsað sér að búa og starfa í Álasundi. „Pabbi minn býr þar. Hann er rafvirki og flutti til Noregs vegna betri kjara.“

Skoðar kjör og atvinnumöguleika

Andri Friðjónsson, varaformaður ungliðadeildar Sjúkraliðafélags Íslands, fór á starfakynningu Norðmanna til þess að kynna sér atvinnumöguleika og kjör. „Ég hef heyrt að norska ríkið greiði sjúkraliðum tvöfalt hærri laun en íslenska ríkið og að einkageirinn í Noregi borgi tvöfalt hærri laun en norska ríkið.“

Andri, sem er á námskeiði hjá Endurmenntunarstofnun í hagnýtri norsku fyrir heilbrigðisstarfsmenn, getur hugsað sér að búa hvar sem er í Noregi fyrst um sinn. „Seinna myndi ég vilja vera nálægt Haugesund þar sem systir mín býr. Hún elti ástina þangað.“