Vill æðarvarp í stað vargfugla í hólma

Sjómaður á Raufarhöfn vill fá leyfi til að útrýma vargi á hólma við bæinn og koma þar upp æðarvarpi.

Jón Ketilsson, sjómaður á Raufarhöfn, hefur óskað eftir leyfi bæjaryfirvalda til að koma upp æðarvarpi í hólma undan vitanum þar í bæ.

Hólminn er reyndar þéttsetinn af vargfugli svo Jón óskar einnig eftir undanþágu til að eyða honum. „Ég verð að fá undanþágu frá lögum til að skjóta hann,“ segir hann.

Jón kveðst þekkja vel til æðarvarpa. „Það var mikið æðarvarp þar sem ég ólst upp,“ segir Jón sem er frá Kollavík í Þistilfirði. „En svo segja mér eldri menn að það hafi verið mikið æðarvarp í hólmanum hér í gamla daga en þegar síldarbræðslan byrjaði árið 1940 kom svo mikill grútur í hafnarmynnið að æðarfuglinn drapst bara.“

Ef öll leyfi fást og vargnum verður komið fyrir kattarnef mun Jón setja dekk út í hólminn sem yrðu eins konar var fyrir æðarfuglinn. Strengja síðan band með flöggum í sterkum litum milli stika til að fæla varginn frá því að koma sér fyrir að nýju.

Erindið var tekið fyrir á bæjarráðsfundi Norðurþings þann 15. ágúst síðastliðinn og tekin var ákvörðun um að vísa málinu til framkvæmda- og hafnanefndar.

„Ég veit ekkert hvað þeir segja um þetta en hins vegar veit ég að bæjarbúar eru ánægðir með þetta,“ segir Jón. Hann segir að verð á æðardún sé með hæsta móti en að það sé ekki aðalhvatinn fyrir þessum áformum. „Þetta er meira svona hobbí hjá mér,“ segir Jón.