Gagnrýnir að Vogur greini ekki frá barnaverndarmálum

Framkvæmdastýra Barnaverndar Reykjavíkur gagnrýnir að meðferðarstofnunin og sjúkrahúsið Vogur tilkynni afar sjaldan mál til barnaverndarnefndar og telur sjúkrahúsið ekki sinna lagaskyldu um slíkar tilkynningar.

„Það er nánast hending, teljandi á fingrum annarrar handar, tilkynningarnar sem hafa borist þaðan. Við höfum velt því fyrir okkur hér, af hverju þeir horfa ekki til tilkynningaskyldunnar, hvort sem það er vegna foreldra eða ungmenna,“ segir Halldóra Gunnarsdóttir, framkvæmdastýra Barnaverndar Reykjavíkur. Hún bendir á að Vogur sé eina meðferðarúrræðið sem í boði sé fyrir unglinga hér á landi og því sé mikilvægt að leyfa barnaverndinni að fylgjast vel með.

„Þeir hafa ef til vill ýmsar skýringar á þessu og kannski finnst þeim trúnaðarsambandið við sjúklingana erfitt. Það breytir því þó ekki að skyldan er þarna og hagsmunir barna ættu alltaf að vera í forgangi,“ segir Halldóra.

Hún segir jafnframt mikilvægt að fá að vita af foreldrum sem sæki oft í meðferð eða hætti í miðju ferli þó ekki sé til annars en að fylgjast með og veita stuðning.

„Það hefur einnig vakið athygli okkar hér að þetta er ekki í neinu samræmi við þann tilkynningafjölda sem við fáum frá sambærilegum stofnunum Landspítalans, eða slysadeild, þar er tilkynnt um minnsta grun um vanrækslu vegna neyslu foreldris. Jafnvel þótt viðkomandi sé að koma þangað í fyrsta skipti. Þetta er mjög greinilega spurning um áherslur,“ segir hún.

Þórarinn Tyrfingsson, yfirlæknir á Vogi, segir starfsfólk sitt ekki hafa forsendur til að tilkynna þessi mál. „Við erum ekki að horfa á hegðun fólksins heima við og við getum ekki gefið okkur það að fólk með fíkn vanræki börnin sín,“ segir Þórarinn.

„Við erum ekki að tilkynna allt sem við heyrum enda erum við ekki í aðstöðu til þess. Við erum hreinlega að hugsa um annað. Það eru aðrir sem tilkynna um það ef börn eru vanrækt og við höfum ekkert með börn að gera. Við erum að fást við fíkn, ekki ofbeldismál.“

Spurður hvort ekki beri að tilkynna mál sem snúa að ungmennum í meðferð segir hann flest þeirra koma inn á vegum barnaverndar. „Barnavernd veit allt um þau,“ segir Þórarinn.

Halldóra segir það þó ekki alltaf svo. „Ef ungmenni hættir í miðri meðferð erum við ekki alltaf látin vita og unglingurinn kannski kominn út í neyslu án þess að við séum meðvituð um það,“ segir hún.

Tilkynningaskyldan, eins og hún er orðuð í barnaverndarlögum:

„Hverjum þeim sem stöðu sinnar og starfa vegna hefur afskipti af málefnum barna og verður í starfi sínu var við að barn búi við óviðunandi uppeldisskilyrði, verði fyrir áreitni eða ofbeldi eða að barn stofni heilsu sinni og þroska í alvarlega hættu er skylt að gera barnaverndarnefnd viðvart,“ segir í lögum.

Læknar og hjúkrunarfræðingar eru nefndir sérstaklega í upptalningu starfsstétta sem þetta á við um. „Tilkynningarskylda […] gengur framar ákvæðum laga eða siðareglna um þagnarskyldu viðkomandi starfsstétta.“