Heimilisgæsin fer í hundabúri í verslunarferðir

Það fjölgaði óvænt í fjölskyldu nokkurri í Reykjanesbæ eftir að hún fór að tína mávaegg snemmsumars úti í Gróf, sem er rétt ofan við smábátahöfnina þar í bæ. Elsta dóttirin, Særún Birta, tók gæsaregg án þess að átta sig á hvers kyns var. Þegar það varð ljóst stakk fjölskyldufaðirinn upp á því að þau reyndu að láta það klekjast út heima úr því sem komið var.

Það varð úr og í sumar hefur gæsin Bíbí elt fjölskylduna á röndum. „Þetta hefur verið mikið umstang en gæsaungar eru þannig að þeir geta ekki verið einir enda var Bíbí orðin mjög hvekkt þegar við skildum hana eina eftir í hálftíma eitt sinn,“ útskýrir Kristín Ingunn Gísladóttir. Húsbóndinn, Birgir Haukdal Rúnarsson, segir að fjölskyldan hafi verið á vöktum í sumar af þessum völdum. „En ég hef ekki þurft að slá blettinn,“ segir hann kankvís. Í verslunarferðum Bíbíar notar fjölskyldan hundabúr sem gæsin unir sér ágætlega í.

Kristín segir að Bíbí sé eins og ein af fjölskyldunni en þó vonast hún til að gæsin hefji sig á loft með sínum líkum í haust og fari á vetrarstöðvar. „Reynslan hefur sýnt það að tamdar gæsir geta bjargað sér í villtri náttúrunni og jafnvel gleymt eftir árið öllu sem þeim var kennt.“ Farið hefur verið með Bíbí til að sjá sína líka en henni brá við þau ósköp. „Svo höfum við sett spegil hjá henni á svölunum svo að hún sjái sjálfa sig en við erum hálf smeyk við að leiða hana til annarra gæsa því það er margt um varginn hérna.“

Það er nokkur kúnst að skapa réttu aðstæðurnar fyrir gæsaregg til að klekjast. Þá kom sér vel baðskápur þeirra hjóna en hann er með hitagrind og því hlýr og góður. „Reyndar var ekki nógu mikill raki svo eggið var þurrt og hart og við heyrðum í Bíbí inni í egginu og urðum að hjálpa henni við að opna það.“ Ekki tók betra við því næst varð að gefa henni vökva úr teskeið en svo komst fuglinn fljótt á legg. „Ég er í raun alveg á móti því að grípa svona inn í hjá náttúrunni,“ segir Kristín Ingunn. „En fyrst þetta þróaðist svona þá var ekkert annað að gera en að vinna úr því af alúð.“