Komnir vel á veg með að virkja hafið

 Valdimar Össurarson uppfinningamaður er þessa dagana að prófa sjávarorkuhverfla sína í hinum straumþunga Hornafirði öðru sinni. Fyrstu tilraunir gáfu góða raun.

„Spaðarnir á hverflinum gripu svo vel í þessum þunga straumi sem hérna er að þeir hreinlega brotnuðu og aðrir löskuðust svo ég varð að styrkja þá aðeins,“ segir hann. „Þetta er í rauninni ánægjulegt vandamál ef svo má segja,“ bætir hann við.



Hann segir ljóst að hverfillinn skilaði töluverðu afli en síðan gaf hann sig áður en eitthvað var farið að mæla að ráði. „Við erum að vonast til þess að fá einhverjar mælingar í þessari tilraun núna sem mínir sérfræðingar og verkfræðingar geta svo skoðað og metið afköstin. Það er vinna sem tekur nokkurn tíma svo það verður eflaust liðið eitthvað fram á vetur áður en við fáum eitthvað í hendurnar.“



Hann vill ekkert um það segja hvaða vonir hann geri sér í þeim efnum en vissulega er ljóst að það er eftir mikilli orku að slægjast. „Ef við heimfærum mælingar Íra, Breta og Norðmanna á okkur Íslendinga þá ættum við að eiga í formi sjávarfallaorku um 330 teravattstundir á ári. Við getum borið það saman við það að við erum nú búin að virkja núna átján teravattstundir á ári.“

Hann segir að tækniþróunarsjóður hafi staðið vel við bakið á honum varðandi þessa uppfinningu en hann segir afar brýnt að stjórnvöld fari að opna augun fyrir þeim hagsmunum sem hér eru í húfi. „Það er til dæmis ekkert farið að mæla þessa orku, það væri ágætis byrjun að gera það,“ segir hann.



Hverflarnir eru á flekum sem notaðir eru við prófanirnar en hugmyndir Valdimars miða að því að hverflarnir verði á sjávarbotninum og því hlýst engin sjónmengun af. Hann segir einnig orku frá hafstraumum stöðugri og fyrirsjáanlegri en gengur og gerist varðandi vind- og ölduorku.