Húsbílafólk sturtar saur á þvottaplanið

„Hér á svæðinu eru húsbílaleigur og það virðist sem leigjendum bílanna séu ekki veittar neinar upplýsingar því þeir halda að hér sé einhver losunarstöð fyrir matarúrgang og saur,“ segir Valur Margeirsson, sem rekur söluturninn Fitjavík í Reykjanesbæ.

„Þeir henda úr klósettum sínum á þvottaplanið. Þar er rás sem vatnið liggur niður, þeir sturta því þar í og þar syndir þetta,“ útskýrir Valur. „Með matarúrgang, þá er ekkert verið að pæla í hvort tunnurnar séu fullar. Þessu er bara hent fyrir utan, svo kemst fuglinn í þetta og dreifir þessu um allt.“

Valur segist hafa hringt í húsbílaleigur á svæðinu en þær firri sig ábyrgð á málinu. „Það er annaðhvort þannig að þetta lið nennir ekki að sinna vinnunni sinni eða að því er bara alveg sama.“ Hann segir losunaraðstöðu ekki vera til staðar á leigunum sjálfum og því lendi það á honum að taka við úrgangi þar sem bensínstöðin hans sé sú síðasta áður en bílunum er skilað.

„Af hverju útbúa ekki húsbílaleigur aðstöðu í sameiningu þar sem fólk getur losað úr án þess að hella þessu öllu yfir mig?,“ spyr Valur. „Ég hefði haldið að það væri lágmarkskrafa að þeir væru með upplýsingar um hvernig ætti að losa þetta.“

Daníel Kjartan Johnson, starfsmaður Ice Rental, húsbílaleigu í Reykjanesbæ, segist agndofa yfir því að menn nýti sér ekki viðskiptamöguleikana. „Lausnin í þessu er sú að hann tæki hreinlega gjald fyrir að fólk sé að henda rusli,“ segir hann.

Daníel segist þekkja til vandamáls Vals og hafi borið það undir framkvæmdastjóra sinn að vera tilbúinn með aðstöðu til þess að losa skolp úr bílunum á leigunum. Það sé nú í undirbúningi. Hjá bílaleigunni reyni menn eftir fremsta megni að beina fólki á rétta staði.

„Ég talaði líka við þá hjá Skeljungi og bar það undir þá að þeir myndu setja upp losunaraðstöðu á stöðvum sínum. Ég segi fyrir mitt leyti að fyrsta bensínstöðvarkeðjan sem auglýsir losunarstöð á hverri stöð á klárlega eftir að fá alla húsbíla, og viðskiptin sem þeim fylgja, til sín.“