Bóla í minkarækt

Undirbúningsvinna er hafin við að reisa tuttugu og þriggja þúsund fermetra minkabú um tvo kílómetra utan við Þorlákshöfn. Áformin miðast við að hafa þar 10 þúsund læður en með slíkum fjölda er hægt að framleiða um 50 þúsund skinn.

Þetta yrði tvöfalt stærra minkabú en minkabúið á Mön, sem nú er hið stærsta á landinu.

Stefán Jónsson, sem er forgöngumaður um nýja búið við Þorlákshöfn ásamt Ármanni Einarssyni, segist vonast til þess að framkvæmdir geti hafist næsta vor.

Peningar fyrir kostnaði eru ekki hristir fram úr erminni en hann gæti orðið um 1,2 til 1,5 milljarðar. Þeir félagar eru nýir í greininni en Stefán er vélsmiður og Ármann útgerðarmaður. „Við ákváðum að prófa enda er mikil gróska í þessari grein,“ segir Stefán.

Þeir eru ekki þeir einu sem hafa hug á minkaræktun því áform um að reisa bú fyrir fjögur þúsund læður á Ásum í Skeiða- og Gnúpverjahreppi situr nú fast í skipulagsferli sem nú þegar hefur tekið eitt og hálft ár.

Ekki heldur áhuginn sig einungis innanlands því Einar Einarsson, ráðunautur og bóndi að Skörðugili í Skagafirði, segir að umboðsmenn fyrir kínverska aðila hafi verið að leita hér hófana með það fyrir augum að reisa risavaxið minkabú. Átti þar að framleiða meira af skinni en framleitt er á öllu landinu í dag. „Ég hef nú ekki heyrt frá þeim í tvær viku svo ég á ekki von á því að neitt verði úr þessu,“ segir Einar.

Að sögn Björns Halldórssonar, formanns Sambands íslenskra loðdýrabænda, eru 28 bú í landinu og hafa aldrei verið fleiri. Fyrir nokkrum árum voru þau einungis 22.

„Það eru mikill áhugi fyrir þessu og margir að spá og spekúlera,“ segir Björn. „Það er líka athyglisvert að það er gríðarlegur áhugi fyrir þessu í Danmörku og Svíþjóð. Það segir ýmislegt þegar áhuginn er svona mikill í landi þar sem smjör drýpur af hverju strái.“

Þar á ofan er útlit fyrir framleiðslu á um 180 þúsund skinnum í ár hér á landi, sem er metframleiðsla.

„Undanfarin tvö ár hafa verið ævintýralega góð en það er allt útlit fyrir að þetta ár verði jafnvel enn betra. Þetta er náttúrlega bóla, við vitum það, en við erum nú allavega nokkrir eldri en tvævetra í þessu svo við förum að öllu með gát og látum hana ekki springa framan í okkur.“

Verð er með allra hagstæðasta móti fyrir íslensk minkaskinn. Um þessar mundir hefur fengist um 13 þúsund fyrir skinnið en það kostar um sex þúsund í framleiðslu.