Perluvinkonur reka verslun í hjarta Nørrebro

„Hugmyndin að Ampersand í núverandi mynd, það er að segja sem vinnustofa og verslun, varð til sumarið 2011 þegar við fengum skyndilega tækifærið til að opna búð í uppáhaldsgötunni okkar, Jægersborggade í Nørrebro. Því gátum við einfaldlega ekki hafnað og hentum okkur bara út í djúpu laugina. Þetta er þó sé kannski ein versta myndlíking sem hægt er að taka þar sem við tvær stóðum lafhræddar á hæsta stökkpallinum í hverfislauginni og þorðum ekki að stökkva út í,“ segja vinkonurnar Eva Dögg Rúnarsdóttir og Anna Sóley Viðarsdóttir. Þær reka verslunina Ampersand í Kaupmannahöfn sem selur allt sem stúlkurnar elska, nota og langar í.

Líkt og áður hefur komið fram stendur Ampersand við Jægersborggade í hjarta Nørrebro og lýsa þær stöllur götunni sem lifandi og síbreytilegri. „Hér er allt að finna. Að minnsta kosti allt sem við þurfum,“ segja þær.

Aðspurðar segja þær viðtökurnar hafa verið frábærar og leggur fjöldi Íslendinga leið sína í verslunina þegar þeir heimsækja borgina. „Við erum alltaf voða upp með okkur þegar Íslendingar koma í heimsókn. Við fáum mikið af forvitnum Dönum sem kíkja á skrýtnu, íslensku stelpurnar og svo erum við komnar með efnilegan hóp fastakúnna,“ segir Eva Dögg.

Fleiri Íslendingar hafa opnað verslanir í Kaupmannahöfn á undanförnum árum og liggur beinast við að spyrja hvort mikil eftirspurn sé eftir íslenskum vörum þar í borg? „Ég veit ekki hvort eftirspurnin eftir íslenskum vörum sé endilega svo mikil, en Dönum þykja þær spennandi og áhugaverðar. Við erum aðeins með örfá og vel valin íslensk merki hjá okkur,“ segir Anna Sóley.

Þegar þær eru að lokum spurðar út í framtíðaráform sín segjast þær huga að heimsyfirráðum. „Heimsyfirráð Ampersand! Nei, okkar áform eru einna helst þau að þróa hugtakið Ampersand og finna okkar farveg. Okkar fókus liggur að miklu leyti í að koma okkar eigin hönnun og framleiðslu á laggirnar.“