Sparaðu með breyttu aksturslagi

„Það er nokkuð mikið hægt að spara með breyttu aksturslagi,“ segir Runólfur Ólafsson, framkvæmdastjóri Félags íslenskra bifreiðaeigenda, um eldsneytisnotkun Íslendinga.

„Það liggja fyrir rannsóknir frá Svíþjóð og algengur árangur er tólf til fimmtán prósent samdráttur í eldsneytisnotkun. Þetta næst bara með því að fylgja flæði umferðarinnar, hlaða bílinn rétt, vera ekki með opnar rúður að óþörfu og svo framvegis,“ segir hann. „Það getur líka verið nokkuð dýrt að þenja bílinn mikið,“ bætir hann við.

Runólfur segir venjulega fjölskyldu geta sparað tugi þúsundi árlega, allt eftir því hversu mikið er ekið og hversu eyðslufrekur heimilisbíllinn er. „Ef við miðum við venjulega fjölskyldu sem kaupir um 2.000 lítra á ári af bensíni og lækkum það svo um fimmtán prósent þá liggur það í augum uppi að það getur verið töluverður sparnaður sem er fólginn í því. Þetta eru tæpar áttatíu þúsund krónur á ári.“

Þá er ljóst að til mikils er að vinna fyrir fyrirtæki að starfsmenn sem keyra á vegum þess temji sér skynsamlegt aksturslag.

Runólfur telur einsýnt að til viðbótar við fjárhagslegan ávinning feli skynsamlegt aksturslag í sér meira öryggi en ella.

Réttur loftþrýstingur í dekkjum eykur veggrip þeirra, auk þess sem rétt hleðsla í bílnum heldur honum stöðugri og útreiknanlegri. Þá sé augljóst hvers vegna það er öruggara að keyra á löglegum og jöfnum hraða.

Runólfur segir Íslendinga vera að vakna til vitundar um hvernig hægt sé að draga úr eldsneytiskostnaði.

„Margir kjósa frekar að fara styttri leiðir. Í sumar hefur þó töluvert stór hópur verið að leita í góða veðrið. Íslendingar eru í öllu falli orðnir mun meðvitaðri og flestir eru farnir að velta því fyrir sér hvernig þeir geta dregið úr eldsneytiseyðslunni,“ segir Runólfur.

„Þetta hefur auðvitað líka leitt til þess að fólk hefur dregið úr ferðum. Fólk fór sem dæmi kannski tvær ferðir um langan veg yfir sumar en fer í stað þess bara eina ferð,“ bætir hann við.

„Sömu hegðun má greina í bílakaupum. Þegar fólk leitar að nýjum bíl er mest spurt um hvað hann eyðir miklu. Hið sama á við um notaða bíla. Þeir notuðu bílar sem ganga best í endursölu eru eyðslugrannir bílar,“ segir hann að lokum.

Eldsneytiseyðsla er aðalmál kaupenda

„Íslendingar eru orðnir mun meðvitaðri um eldsneytiseyðslu en áður,“ segir Runólfur. Fyrir vikið er eldsneytiseyðsla bíls jafnan það fyrsta sem horft er til þegar nýr bíll er keyptur. „Æ fleiri velta fyrir sér eldsneytiseyðslunni og hvernig megi draga úr henni,“ bætir hann við. „Notaðir bílar sem eyða litlu eru bestir í endursölu,“ segir Runólfur að lokum.



Hvað kostar ferðin?

Á vefsíðu Orkuseturs er hægt að reikna út hversu miklu þarf að eyða í eldsneyti í ferðalögum innanlands. Þar er hægt að slá inn bílnúmer og upphafs- og áfangastað. Reiknivélin sér svo um allt nema að dæla og borga.

10 ráð til að minnka eldsneytisnotkun:

1.Hafðu loftþrýsting í hjólbörðunum jafnan og sem næst ráðlögðu hámarki.

2.Hafðu sem minnst í bílnum til að draga úr þyngd hans.

3.Forðastu að aka um með opna glugga, farangursgrind, skíða- eða farangursbox á þaki bílsins nema þörf krefji.

4.Frá því tekið er af stað eftir ræsingu á að skipta eins fljótt og mögulegt er upp í annan gír og síðan áfram í hærri gíra með léttum inngjöfum. Skiptið ökutækinu upp með vélina á léttum snúningi og forðist mikinn snúningshraða í akstri og snögghemlun.

5.Venjið ykkur á að aka með jöfnum inngjöfum, æskilegur snúningshraði er undir 2.000 snúningum á mínútu. Þar sem því er viðkomið á að aka sem mest í efstu gírum.

6.Veldu greiðfærar umferðargötur til að draga úr stoppum. Æskilegt er að aka í takt við flæði umferðarinnar.

7.Aktu á löglegum hraða, það borgar sig. Hraðakstur eykur bensíneyðslu, veldur umhverfisspjöllum og er hættulegur.

8.Stöðvaðu vélina ef bíllinn er í hægagangi meira en eina mínútu.

9.Sparið loftkælinguna ef hægt er.

10.Skiptu reglulega um olíu og loftsíu í samræmi við ráðleggingar framleiðanda. Vélin gengur léttar og slitnar minna.