Leikur einfaldan og áhrifagjarnan Hrein Skjöld

„Aðalpersónan heitir Hreinn Skjöldur og þáttaröðin fjallar um hann, bestu vinkonu hans og bróður hennar. Þetta eru sjö þættir og við nýtum hverja einustu sekúndu í brandara. Dagurinn sem serían fer í loftið verður stór dagur fyrir grínunnendur,“ segir grínistinn Steinþór Hróar Steinþórsson, eða Steindi jr., um nýja sjónvarpsþáttaröð sem hann skrifar og framleiðir ásamt Ágústi Bent Sigbertssyni og Magnúsi Leifssyni. Tökur á þáttunum hefjast í haust og verða þeir sýndir á Stöð 2 snemma á næsta ári.

Steindi fer með hlutverk Hreins Skjaldar og lýsir persónunni sem einföldum manni og áhrifagjörnum. Söguþráður þáttanna er að venju ýktur og óvenjulegur og kemst Hreinn Skjöldur meðal annars í tæri við andsetinn skólastjóra, neðanjarðarátkeppni og djammara sem yfirtaka Herjólf.

Þetta er í fyrsta sinn sem þremenningarnir skrifa handrit að sjónvarpsþáttaröð af þessu tagi en áður höfðu þeir skrifað handrit að sketsaþáttum sem sýndir voru á Stöð 2. „Þetta var mikil vinna og við skráðum okkur meðal annars í ritsmiðju hjá Hafsteini Gunnari [Sigurðssyni] og Árna Ólafi [Ásgeirssyni]. Svo lágum við yfir bókum og öðru efni á netinu,“ segir hann.

Inntur eftir því hvort honum þyki handritsskrifin skemmtilegri en leikurinn segist Steindi ekki geta gert upp á milli. „Þetta er ólíkt en jafn skemmtilegt. Þegar maður er búinn að skrifa í einhvern tíma saknar maður þess að fara á sett og djöflast allan daginn. En svo þegar maður er búinn að vera lengi á setti, þá saknar maður þess að geta sest niður, skrifað og hlustað á tónlist,“ segir hann að lokum.