Stöndum við bakið á Ása

Fylkir hefur aldrei byrjað verr í efstu deild karla en nú. Liðið er með tvö stig eftir fyrstu átta leikina og fátt annað en fall blasir við Árbæingum með sama áframhaldi. Fylkismönnum gekk þó ágætlega fyrir tímabilið og voru margir stórhuga fyrir sumarið. Stefnan var sett á að vinna sér þátttökurétt í Evrópudeildinni, sem er í besta falli fjarlægur draumur í dag.

„Af núverandi liðum í Pepsi-deildinni höfum við verið næstlengst í deildinni samfellt. Og við höfum aldrei byrjað verr – það er bara staðreynd,“ sagði Ásgeir Ásgeirsson, formaður knattspyrnudeildar Fylkis, í samtali við Fréttablaðið í gær.

„Við höfum verið frekar óheppin með meiðsli upp á síðkastið, sem hefur gert það að verkum að þjálfarinn [Ásmundur Arnarsson] hefur neyðst til að gera miklar breytingar á milli leikja. Því miður hefur það púsluspil ekki gengið nógu vel,“ segir Ásgeir en bendir þó á að liðið hafi bætt sig í síðustu leikjum, þá sérstaklega í varnarleiknum.

„Fyrri hálfleikur gegn FH var til að mynda mjög fínn,“ sagði hann, en Fylkir hafði 1-0 forystu í hálfleik á mánudagskvöldið. FH vann að lokum 2-1 sigur.

„Við höfum fengið á okkur mörg klaufaleg mörk sem hafa reynst dýrkeypt. En við höldum ótrauðir áfram og vonumst til þess að við getum snúið genginu við.“

Þurfum að kaupa leikmenn

Þrjú lið, sem öll standa betur en Fylkir, hafa skipt um þjálfara á tímabilinu en Ásgeir segir að sú umræða hafi aldrei farið af stað innan stjórnar deildarinnar.

„Við viljum þétta raðir okkar og stöndum við bakið á Ása. Það er ekki alltaf lausnin að skipta mönnum út. Við erum fyrst og fremst að ræða um hvað hægt er að gera til að bæta gengi liðsins.“

Ein leið til þess er að styrkja leikmannahópinn og segir Ásgeir að það verði gert þegar opnað verði fyrir félagaskipti um miðjan næsta mánuð. „Við þurfum að gera það, ekki síst vegna þess að við munum missa þrjá leikmenn í haust þegar þeir fara til Bandaríkjanna í nám,“ segir hann, en þetta eru þeir Andri Þór Jónsson, Oddur Ingi Guðmundsson og Davíð Ásbjörnsson.

Staðan metin er mótið er hálfnað

Fylkir mætir toppliði KR á sunnudagskvöldið og svo Víkingi Ólafsvík og ÍA í næstu deildarleikjum á eftir. Síðastnefndu tveir leikirnir munu hafa mikla þýðingu um botnbaráttuna enda þrjú neðstu lið deildarinnar, en þau hafa samanlagt sex stig eftir átta umferðir.

Eftir þessa leiki verður mótið hálfnað og Ásgeir segir að staðan verði endurmetin þá.

„Það er ágætis tímapunktur til þess þá. Staðan er auðvitað ekki góð en það eru þó nokkur lið í vandræðum og nóg eftir af mótinu. Gengi liðsins hefur áhrif á allt starf félagsins og því vonumst við auðvitað til þess að það fari að birta til.“

Ósk leikmanna að taka þátt í kostnaði

Fyrir leik Fylkis gegn Sindra frá Höfn í Hornafirði í 16-liða úrslitum Borgunarbikarkeppni karla kvisaðist út að leikmenn hefðu greitt tíu þúsund krónur hver fyrir ferðakostnaði liðsins til Hafnar. Við það tilefni tóku stuðningsmenn Sindra sig til og settu í gang „söfnun“ til styrktar leikmönnum Fylkis.

„Þessi umræða var auðvitað út í hött,“ segir Ásgeir. „Upphaflega áætlunin var að fara akandi en við buðum leikmönnum upp á þann möguleika að fljúga ef þeir tækju þátt í kostnaðinum, sem þeir þáðu. Það var því gert, þrátt fyrir að það hafi á endanum kostað félagið meira en að leigja rútu. Staðan var því ekki verri en það,“ segir Ásgeir.

„Við viljum reka félagið skynsamlega og erum með aðhald í rekstri. Enda hefur reksturinn gengið ágætlega.“