Nýr gervigrasvöllur algjör bylting

Knattspyrnufélagið KA á Akureyri tekur í notkun glænýjan gervigrasvöll á næstu dögum en völlurinn mun gjörbreyta æfingaaðstöðu félagsins allt árið. „Síðustu tvö sumur höfum við getað æft á okkar svæði í átta vikur á ári og því er þetta mikil búbót fyrir okkur KA-menn,“ segir Sævar Pétursson, framkvæmdastjóri KA.

„Það verður rosalegur munur fyrir okkur að vera með völl í fullri stærð sem er nothæfur allt árið.“

Æfingasvæði KA-manna hefur komið verulega illa undan vetri síðastliðin ár og í raun alveg ónothæft stóran hluta sumarsins.

„Við erum svona að gera okkur vonir um að geta hleypt okkar iðkendum inn á grasið í næstu viku. Þetta hefur verið skelfilegur vetur og mikill klaki undir öllu svæðinu. Á síðasta ári var ekki hægt að hleypa inn á svæðið fyrir en um miðjan júlí.“

Knattspyrnuhöllin Boginn var byggð árið 2003 en KA og Þór deila höllinni fyrir sitt íþróttafólk.

„KA hefur aðgang að Boganum þrjá daga í viku og það er alls ekki nægilega mikill tími fyrir okkar iðkendur. Allir flokkar fá aðeins hálfan völlinn út af fyrir sig en 2. flokkur karla, sem eru yfir fjörutíu strákar, eru til að mynda aðeins með tíma í Boganum í eina klukkustund á viku. Við verðum samt sem áður enn þá með einhvern tíma í Boganum út af veðrum og vindum. Þórsarar eiga líklega einnig eftir að nýta sér okkar gervigrasvöll í vetur.“

Gervigrasið sem lagt var á KA-svæðinu er sams konar og á Stjörnuvelli í Garðabæ.

„Þetta er völlur sem er í fullri stærð með frábært gras. Allir flokkar félagsins geta núna farið að spila einhverja æfingaleiki á vellinum allt árið um kring. Ég er viss um að félögin nálægt Akureyri eins og Magni á Dalvík og fleiri eiga eftir að koma og nýta sér þessa aðstöðu.“