Þrír handteknir vegna hópnauðgunar á Indlandi

Þrír menn voru handeknir í Indlandi í morgun vegna gruns um að hafa nauðgað bandarískri konu fyrr í vikunni. Nauðgunin átti sér stað skammt frá ferðamannabænum Manali í norðurhluta Indlands á mánudagskvöld.

Að sögn lögreglu eru mennirnir á aldrinum 22 til 24 ára. Þeir eru sakaðir um að hafa boðið konunni, sem er þrítug, far á mánudagskvöld, en keyrt hana þaðan á afvikinn stað þar sem þeir hafi nauðgað henni.

Kynferðisofbeldi er landlægt vandamál í Indlandi þar sem fjölmörg sláandi mál hafa komið upp á yfirborðið síðustu mánuði. Eftir að konu ein lést eftir hrottalega nauðgun í Nýju Delí í desember komu upp háværar kröfur um bætt öryggi kvenna.

Í gær handtók lögregla í borginni Kolkata mann sem er grunaður um að hafa nauðgað írskri konu sem vann á barnaheimili í borginni. Þá voru sex manns handteknir í mars fyrir að nauðga svissneskri ferðakonu.

Indversk stjórnvöld hafa brugðist við með því að þyngja refsingar fyrir nauðganir og færa ýmis konar athæfi, líkt og ofsóknir og mansal, undir hegningarlög.