Gríma leikur ömmu Grettis

„Ég leik pabba Guðmundar og systir mín leikur ömmu mína,“ sagði Grettir Valsson, en systkinin Gríma og Grettir koma til með að leika hlið við hlið í nýrri uppsetningu Þjóðleikhússins á Óvitunum.

Verkið verður frumsýnt í október. Grettir er aðeins ellefu ára gamall en er ekki ókunnugur leiklistinni því hann hefur leikið í fjölda uppsetninga, til að mynda Galdrakarlinum í Oz, Mary Poppins og Oliver Twist, svo eitthvað sé nefnt. Hann hefur einnig talað inn á fjölda teiknimynda. Gríma, sem er átta ára gömul, mun þreyta frumraun sína á sviði á nýju leikári.

Óhætt er að segja að systkinin muni taka sig vel út á sviðinu, hlið við hlið. Það má segja að þeim Gretti og Grímu sé leikhúsáhuginn í blóð borinn því foreldrar þeirra eru leikmyndahönnuðurinn Ilmur Stefánsdóttir og leikarinn og leikskáldið Valur Freyr Einarsson. Það læra börnin sem fyrir þeim er haft.

„Þetta var bara alveg hræðilega erfitt val,“ segir leikstjórinn Gunnar Helgason sem stýrir uppfærslunni.

Leikritið er eftir Guðrúnu Helgadóttur þar sem börn leika fullorðna og öfugt. Tæplega 1300 krakkar sóttust eftir því að komast á svið og í vikunni var gengið frá ráðningu 30 krakka sem skipta 15 hlutverkum á milli sín. „Þetta var gríðarlega erfiður prósess sem stóð yfir í mánuð. Við enduðum með því að bæta við tveimur hlutverkum til að koma fleirum að en upphaflega voru hlutverkin 28,“ segir Gunnar og bætir við að hann hafi misst svefn yfir leikaravalinu. „Það var mjög leiðinlegt að þurfa að vísa hæfileikaríkum krökkum frá og maður var endalaust að velta fyrir sér hvort maður hefði valið rétt.“

Hópurinn hittist í fyrsta sinn á mánudaginn þar sem þau lásu saman leikritið. „Þá sáum við að við höfðum valið rétt, allir smellpössuðu í sín hlutverk.“ Með önnur hlutverk í verkinu fara meðal annarra Jóhannes Haukur Jóhannesson, Ágústa Eva Erlendsdóttir og Örn Árnason.