Byrjar betur en forverarnir

89. mínúta á Kópavogsvelli á þriðjudagskvöldið. Róbert Örn Óskarsson er búinn að spila óaðfinnanlega allan leikinn, verja nokkrum sinnum vel og grípa vel inn í þegar það á við. Stigin þrjú eru að leggja af stað til Hafnarfjarðar þegar FH-liðið fær á sig klaufalega vítaspyrnu.

Róbert Örn ætlar ekki að láta þessi stig renna FH-liðinu úr greipum, ekki frekar en þegar hann varði á mikilvægum tímapunktum í fyrstu þremur leikjunum. Róbert klikkar heldur ekki á ögurstundu, ver víti Blikans Árna Vilhjálmssonar glæsilega og tryggir FH þrjú gullin stig á móti einu af sterkari liðum Pepsi-deildarinnar. Maður leiksins í tveimur leikjum í röð

Eftir fjóra umferðir lítur allt út fyrir að ákvörðun Heimis Guðjónssonar sé að heppnast fullkomlega. FH hefur aðeins fengið á sig tvö mörk og hefur náð í 10 stig af 12 mögulegum. Róbert Örn Óskarsson hefur fengið 7,3 í meðaleinkunn fyrir þessa fjóra leiki og hefur verið valinn maður leiksins í síðustu tveimur leikjum. Hann er auk þess besti leikmaður 4. umferðar Pepsi-deildarinnar að mati blaðamanna Fréttablaðsins.

„Ég gerði nokkur mistök á undirbúningstímabilinu sem ég vissi að ég myndi gera. En ég vil miklu frekar gera mistök yfir veturinn en á miðju tímabili,“ sagði Róbert í viðtali við Fréttablaðið fyrir leikinn á móti Blikum. Þetta var annar sjónvarpsleikur hans í röð og í þeim báðum hefur hann verið besti maðurinn á vellinum að mati fulltrúa Fréttablaðsins á leiknum.

Þó að Róbert Örn Óskarsson hafi aðeins átt einn leik að baki í efstu deild (á móti ÍBV í Eyjum í fyrra) þá er ekki eins og hann sé fæddur í gær. Hann er orðinn 26 ára gamall og á að baki tímabil með ÍR (1. deild 2011) og BÍ/Bolungarvík (2. deild 2009 og 2010).

Hann naut einnig þess að vinna með landsliðsmarkverðinum Gunnleifi Gunnleifssyni á síðustu leiktíð sem Róbert hefur talað sjálfur um að hjálpi sér við að standa í þessum sporum. Það má heldur ekki gleyma að á bekknum nýtur Róbert stuðnings reynsluboltans Daða Lárussonar, sem er reynslumesti markvörður FH í efstu deild.

En hversu góð byrjun er þetta? Fréttablaðið skoðaði af þessu góða tilefni byrjun Róberts í samanburði við síðustu fjóra aðalmarkverði FH-inga í efstu deild en það eru þeir Gunnleifur Gunnleifsson (2010-12), Daði Lárusson (2001-09), Stefán Arnarson (1991-1995) og Halldór Halldórsson (1985-87 og 1989-90). Aðrir markverðir hafa komið inn í forföllum þeirra.

Það er óhætt að segja að Róbert skjóti hinum fjórum FH-markvörðunum ref fyrir rass. Hann fékk á sig færri mörk en þeir allir í fyrstu fjórum leikjunum og FH-liðið er líka með fleiri stig í húsi.

Í viðbót við það varði Róbert eina vítið sem hann reyndi við en þrír af hinum fjórum fengu á sig mark úr víti í fyrstu fjórum leikjunum og engum þeirra tókst að verja víti. Hér á síðunni má sjá samanburð á byrjun þessara fimm markvarða á sínu fyrsta tímabili sem aðalmarkvörður FH-liðsins í efstu deild.