Skíthræddur við að feta í fótspor Hetjanna

„Ég er auðvitað skíthræddur við að reyna að feta í fótspor Hetjanna en ég ætla að reyna. Það kemur samt ekki til greina að ég reyni að stæla útlitið, enda engar líkur á að það myndi nást," segir rokkarinn og Eurovision-farinn Eyþór Ingi Gunnlaugsson.

Eyþór Ingi er meðal flytjenda á Skonrokktónleikum sem haldnir verða í Hörpu á morgun. Tyrkja-Gudda, sem er batteríið á bak við Skonrokk, hefur nú farið í samstarf með Mottumars og verður tilkynnt um sigurvegara söfnunar Krabbameinsfélagsins í upphafi tónleikana, auk þess sem verðlaun verða veitt fyrir flottustu mottuna. Þar á eftir tryllir Tyrkja-Gudda lýðinn en ekki er ljóst hvort Hetjurnar koma sjálfar til með að stíga á svið. Uppi hefur verið orðrómur um það að ósættið sem olli slitum þeirra á níunda áratuginum hafi nú látið aftur á sér kræla og í ljósi óvissunnar hefur Eyþór Ingi haft vaðið fyrir neðan sig og æft lag þeirra, Villibráð, stíft að undanförnu. Ein hetjanna, Blær, hefur þó boðað komu sína en alls óvíst er hvort hann tekur lagið.

Það vakti athygli þegar Eyþór mætti á frumsýningu Eurovision-myndbandsins í síðustu viku og búinn að raka af sér allt skeggið. Spurður hvort hann ætli að safna í mottu fyrir tónleikana segist hann efast um að það náist. „Við leggjum okkar af mörkum á þennan hátt í staðinn, og með bolasölunni," segir hann, en Tyrkja-Gudda og Mottumars hafa látið hanna boli með merki tónleikanna og allur ágóði af sölu þeirra rennur í átakið.

Auk Eyþórs koma þeir Magni, Páll Rósinkranz, Pétur Guðmunds og Biggi Haralds fram á tónleikunum svo það er óhætt að segja að búast megi við algjörri rokkveislu.