Hélt ég fengi í mesta lagi tuttugu læk

„Ég bjóst aldrei við þessum viðbrögðum, hélt ég mundi í mesta lagi fá tuttugu læk á þessa fyrirspurn mína,“ segir framhaldsskólaneminn Ólafur Pálmarsson en hann tók sig til og sendi fyrirspurn á Facebook-síðu Dominos þar sem hann lagði til að þeir myndu breyta nafni á pitsu á matseðli staðarins. Um er að ræða pitsuna PS2, pitsu með pepperoni og sveppum en Ólafur lagið til að nafninu yrði breytt í svepperóní.

Það er greinilegt að fjöldi manns var sammála honum því á innan við þremur klukkutímum voru tvö þúsund manns búnir að læka uppástungu Ólafs á Facebook. Dominos hefur nú brugðist við fyrirspurninni og breytt nafni pitsunnar í svepperóní.

„Mér datt þetta bara í hug um daginn þegar ég var einmitt að borða pitsu með pepperóníi og sveppum með bræðrum mínum. Við vorum sammála um að PS2 væri ekki nógu gott nafn og ég var búinn að hugsa heillengi um hvaða nafn væri betra þegar mér datt þetta í hug,“ segir Ólafur og kveðst vera mikill aðdáandi pitsustaðarins. Ólafur er stoltur af þessu afreki sínu og ætlar ekki að panta neitt annað í framtíðinni.

Magnús Haraldsson, markaðs-og rekstrarstjóri hjá Dominos, segir þá taka uppátæki Ólafs fagnandi. „Við verðum að bregðast við þegar uppástungan fær svona góð viðbrögð. Við erum vanir að fá tillögur frá viðskiptavinum okkar en þær snúa yfirleitt að samsetningunum frekar en nöfnum. Við ætlum svo að vera með svepperóní á þúsund krónur um næstu helgi til að fagna nafnbreytingunni.“ segir Magnús.