Björn bíður eftir Elsu, og Elsa eftir Birni

„Við erum bara að bíða,“ sagði Björn Zoega, forstjóri Landspítalans, þegar Fréttablaðið hafði samband við hann í gærkvöld. „Við erum búin að spila út því sem við höfum og það er ekki tilboð heldur er þetta það sem við höfum í höndunum. Við höfum ekki úr meiru að spila.“

„Það hefur ekki verið boðað til fundar með okkur,“ sagði síðan Elsa B. Friðfinnsdóttir, formaður Félags hjúkrunarfræðinga, þegar Fréttablaðið hafði samband við hana í gærkvöld. „Þannig að það er í sjálfu sér ekkert að gerast.“

Hún segir að hjúkrunarfræðingar hafi enn vilja til að semja: „En okkar mat og þeirra sem mættu á þennan fjölmenna fund hjá okkur á mánudag er að þetta sé ekki nóg.“

Staðan hefur því verið sú, frá því á mánudag, að hjúkrunarfræðingar bíða eftir því að yfirstjórn Landspítalans hafi samband, og yfirstjórn Landspítalans bíður eftir því að hjúkrunarfræðingar hafi samband.

„Nú? Það er þá kannski rétt að fara að gera eitthvað,“ sagði Elsa, þegar hún frétti í gærkvöld að yfirstjórn Landspítalans væri að bíða eftir útspili frá hjúkrunarfræðingum. „En það er ljóst að það þarf meira fjármagn, og það verður annaðhvort að koma úr ríkissjóði eða að einhverjar tilfærslur verði innan spítalans.“

Á morgun rennur út frestur sem Landspítalinn hefur sett hjúkrunarfræðingum til að draga uppsagnir sínar til baka.