Mun færri kynferðisbrot en síðustu ár

Fertugur maður var í nótt handtekinn vegna gruns um kynferðisbrot gegn tvítugri stúlku á Þjóðhátíð í Vestmannaeyjum. Stúlkan hefur þegar kært manninn vegna brotsins.

Maðurinn var handtekinn skömmu eftir miðnætti og færður í fangageymslur í Vestmannaeyjum. Hann var fluttur á Selfoss síðdegis þar sem hann var yfirheyrður. Hann er sakaður um að hafa neytt stúlkuna til munnmaka. Karl Gauti Hjaltason, sýslumaður, í Vestmannaeyjum þakkar auknum forvörnum að kærur fyrir kynferðisbrot hafi ekki verið fleiri.

„Hátíðarhaldarar hafa undanfarin ár gefið út sterkar yfirlýsingar um að þeir séu andvígir þessum skoðunum og þessum mönnum. Svona menn eru óvelkomnir til Vestmannaeyja og hér er enginn griðastaður fyrir þá. Ég veit ekki hvort þetta spilar inn í en það eru mun færri kynferðisbrot núna en síðustu ár. Það er ein kæra fyrir kynferðisbrot sem liggur fyrir eftir helgina. Ég er ánægður með þessa þróun og vona að það verði framhald á henni,“ segir Karl Gauti.

Töluverður erill var hjá lögreglunni í Vestmannaeyjum í nótt. Allar fangageymslur voru fullar og rúmlega það því á tímabili þurfti að hleypa mönnum út fyrir aðra sem voru á leið inn. 14 minniháttar fíkniefnamál komu upp í nótt og í heildina um 50 yfir helgina.

„Þetta hefur verið með rólegri hátíðum sem ég man eftir. Vissulega hefur verið erill, sérstaklega á nóttunni, en þetta hefur bara tekist ágætlega.“

Tvær kærur vegna líkamsárása liggja fyrir hjá lögreglunni í Vestmannaeyjum. Að sögn lögreglunnar í Vestmannaeyjum eru þær báðar minniháttar.

Á Mýrarboltanum á Ísafirði voru tvær minniháttar líkamsárásir tilkynntar til lögreglu. Töluverð ölvun var í bænum og eitthvað um pústra. Enginn fíkniefnamál né ölvunarakstur komu inn á borð lögreglunnar í bænum.

Á Akureyri fór fram fjölskylduhátíðin, Ein með öllu. Að sögn lögreglu gekk allt með besta móti en talið er að um fimm þúsund manns hafi heimsótt Akureyri um helgina. Nokkuð kalt var í veðri alla hátíðina sem mun þó ekki hafa haft áhrif á stemninguna.