Dæmdur fyrir að kasta glasi í andlit fyrrverandi eiginkonu sinnar

Héraðsdómur Reykjaness dæmdi í dag tvo karlmenn í fangelsi fyrir líkamsárásir. Annar fyrir líkamsárás gegn fyrrverandi eiginkonu sinni sem og hótanir gegn henni. Hann var dæmdur til tíu mánaða fangelsisvistar en níu af þeim tíu mánuðum eru skilorðsbundnir til þriggja ára.

Maðurinn ku hafa hent glasi í andlit konunnar en hún fékk í kjölfarið skurð á ennið og töluverða bólgu fyrir ofan vinstra auga.

Konan varð síðan einnig fyrir annarri líkamsárás af hendi fyrrum eiginmanns síns er hann sló konuna tvívegis í andlitið. Hann mun einnig hafa sent henni hótanir í gegnum síma og með smáskilaboðum.

Síðari maðurinn var síðan sakfelldur í dag fyrir hættulega líkamsárás og fjársvik. Maðurinn neitaði að greiða leigubílsstjóra eftir að hafa tekið leigubíl frá miðbæ Reykjavíkur í Hafnafjörð.

Maðurinn mun hafa slegið leigubílstjórann með glerflösku í andlitið og var dæmdur í sjö mánaða fangelsi en sex þeirra mánaða eru skilorðsbundnir til þriggja ára.