Björt framtíð stærst og Píratar ná inn manni í Reykjavík

Björt framtíð fengi rösklega 29 prósenta fylgi og tapaði einum manni, ef gengið yrði til borgarstjórnarkosninga nú, samkvæmt nýrri könnun Félagsvísindastofnunar Háskóla Íslands fyrir Morgunblaðið.

Sjálfstæðisflokkurinn  tapaði fimm prósentustigum frá síðustu kosningum og fengi rösklega 26 prósent, og héldi sínum fulltrúafjölda naumlega, þannig að hann og Björt framtíð fengju fimm fulltrúa hvor.

Samfylkingin fengi 17,6 prósent, heldur minna en í kosningunum, en héldi þremur fulltrúum, Vinstri grænir bættu við sig tæplega tveimur prósentustigum fengju níu prósent og héldu sínum manni, og Píratar fengju liðlega tíu prósent og einn fulltrúa auk þess sem þeir eru nálægt því að fella fimmta fulltrúa Sjálfstæðisflokksins.  Aðrir flokkar fengju mun minna og enga fulltrúa.

Þegar spurt var hver ætti að verða næsti borgarstjóri nefna flestir Dag B. Eggertsson, eða 33,1 prósent, en tæp tólf prósent nefna Halldór Halldórsson, oddvita Sjálfstæðismanna.