Karlmaður féll sex metra og lést

Karlmaður lést þegar hann féll sex metra niður af svölum húss í Vesturbæ Reykjavíkur. Samkvæmt upplýsingum frá lögreglunni er verið að rannsaka tildrög þess að maðurinn féll, en samkvæmt upplýsingum frá lögreglunni lítur út fyrir að um slys hafi verið að ræða. Ekki var búið að ná í aðstandendur mannsins þegar fréttastofa náði tali af lögreglu nú rétt fyrir klukkan ellefu.

Engin vitni urðu að atburðarrásinni en um klukkan sex í morgun kom fólk að manninum og lét vita. Lögreglan er með nokkra einstaklinga í skýrslutöku til að fá skýrari mynd af atburðarrásinni.