14.000 e-töflur gerðar upptækar í tollinum

Það sem af er þessu ári hafa tollverðir stöðvað smygl á rúmlega 14.000 e-töflum. Það er mun meira magn af töflum en árið 2012, þegar haldlagðar voru 1.500 e-töflur.

Sömu sögu er að segja um tilraunir til smygls á LSD. Þar hefur magnið stóraukist milli ára og það sem af er þessu ári hafa tæplega 700 skammtar af efninu verið haldlagðir á móti tíu skömmtum á síðasta ári.

Þá hefur metmagn af amfetamíni einnig verið haldlagt á þessu ári, eða rúm 30 kíló. Þar að auki hafa verið haldlagðar 300 amfetamíntöflur og ríflega 1.700 millilítrar af amfetamínbasa, sem umreiknaðir í grömm nema rúmlega 17 kílóum af amfetamíni í föstu formi.