Íslensk glæpasaga í virtu erlendu tímariti

„Þetta er sennilega virtasta glæpasagnatímarit heims, það hefur verið til í rúm sjötíu ár og er allavega stærsta svona blaðið í Bandaríkjunum,“ segir Ragnar Jónasson glæpasagnahöfundur sem á smásögu í hinu virta glæpasagnatímariti Ellery Queen‘s Mystery Magazine.

Ragnar er fyrstur Íslendinga til að komast í þetta virta tímarit en þar hafa komið sögur eftir marga af þekktustu höfundum sögunnar, á borð við Agöthu Christie, P.D. James og Stephen King.

„King hefur kallað tímaritið besta sakamálasögutímarit heims,“ bætir Ragnar við.

Saga Ragnars heitir heitir Death of a Sunflower.

„Sagan var upphaflega skrifuð í tengslum við bókamessu sem haldin var í Frankfurt en þar var Ísland eins konar heiðursgestur,“ útskýrir Ragnar.

Sagan hefur ekki birst á íslensku en hún kom fyrst út í þýskri þýðingu í smásagnasafni árið 2011 undir heitinu Hótel Borg og gerist einmitt á Hótel Borg.

„Þetta er glæpasaga sem gerist árið 2008, rétt eftir bankahrunið. Hún segir frá eldri manni sem snýr heim til Íslands til þess að gera upp gamlar syndir, en nákvæmlega hálfri öld áður lést unnusta hans með voveiflegum hætti skammt frá hótelinu.“

Ragnar segist hafa mikinn áhuga á glæpasögum og horfa mikið á glæpaefni í sjónvarpi. Aðspurður um vinnuna við að skrifa skáldsögu segir Ragnar: „Meðgöngutíminn getur alveg verið tvö til þrjú ár og ég er alltaf að skrifa niður hugmyndir. Ég er samt mislengi að skrifa en það tekur nú yfirleitt allavega eitt ár að skrifa eina bók.“

Nýlega kom út fimmta skáldsaga Ragnars sem nefnist Andköf. Hún er fjórða bókin í glæpasagnaseríu en áður höfðu bækurnar Snjóblinda, Myrknætti og Rof komið út. Sagafilm hefur keypt réttinn til að kvikmynda seríuna.

„Við erum að þróa þetta ásamt Þorvaldi Davíð Kristjánssyni leikara en það er enn óljóst hvenær þetta fer í framleiðslu,“ bætir Ragnar við.