„Vímuefnanotkun er vágestur sem við verðum að takast á við“

„Vímuefnanotkun er vágestur sem við verðum að takast á við," segir Elliði Vignisson, bæjarstjóri í Vestmannaeyjum. Vinnslustöðin í Vestmannaeyjum sagði nýverið upp ellefu sjómönnum eftir að þeir féllu á vímuefnaprófi. Ísfélagið hefur í hyggju að framkvæma svipuð próf.

„Þetta er langt frá því að vera eina leiðin til að takast á við slík mál," segir Elliði. „En þetta er leið við höfum ekki reynt mikið hingað en viljum láta reyna á.

Elliði segir að atvinnulífið í Vestmannaeyjum, bæjarstjórn og íbúar verði að taka höndum saman í þessu máli. Elliði var gestur í útvarpsþættinum Reykjavík síðdegis á Bylgjunni í dag.

„Þetta verður að vera í takt við réttindi fólks. Það er ekki verið að reyna að brjóta á fólki," segir Elliði og bendir á að nauðsynlegt sé að taka tillit til mismunandi vinnustaða og kjarasamninga þegar vímuefnapróf eru til skoðunar.

En er þetta yfirleitt í starfssamningum?

„Það er möguleiki að setja þetta inn í ráðningarsamninga," segir Elliði og bætir við: „Það er vont að sjá þetta uppþot sem verður út af jafn sjálfsögðum hlut og þegar það er mælt með vímuefnaprófum þegar það er í ráðningarsamningi."

Hægt er að hlusta á fróðlegt viðtal við Elliða hér fyrir ofan.