Hvetur pör til að halda spjaldtölvum fjarri rúminu

Kynfræðingur hvetur pör til þess að skilja spjaldtölvurnar eftir frammi þegar farið er inn í rúm, en tölvur eru ein af ástæðum þess að mikill samdráttur er í kynlífi hjá Bretum.

Í dag kemur fram á vef The Guardian að kynlíf hjá Bretum fer dalandi og er talið að á meðal ástæðna sé tölvuvæðingin, en fólk er í ríkari mæli að taka tölvurnar með sér upp í rúm og bitnar það á samlífinu.

Fréttastofa ræddi við nokkra einstaklinga í sambúð í dag og virðist það líka vera til hér á landi að fólk taki tölvuna með sér upp í rúm.

Kynfræðingurinn Sigga Dögg segir að það geti verið tvíeggja sverð að pör fari með tölvuna í bólið. Það sé kannski kósý að horfa á nokkra þætti en tímanum getur þó verið betur varið. Hún segir að meðaltími samfara, með forleik, sé um 15 mínútur og því ætti frekar að stunda kynlíf og horfa svo kannski á einn þátt í staðinn fyrir að taka tvo þætti og vera svo of þreyttur fyrir kynlíf á eftir.

Sigga er á því að það besta í stöðunni sé að skilja tölvuna eftir frammi þegar farið er inn í rúm. „Og fara upp í rúm með hvort öðru,. Hvort sem það er til að kela eða kjafta saman, en þetta gleymist oft“, segir hún.