Farsímar í lokuðum umslögum á ríkisstjórnarfundum

Ráðherrar verða nú að skilja farsíma sína eftir í lokuðu umslagi á meðan ríkisstjórnarfundir standa yfir. Þetta kemur fram í frétt RÚV nú í kvöld. Í fréttinni segir að öryggi hafi verið eflt, meðal annars vegna ótta við hleranir.

Sigurður Már Jónsson, upplýsingafulltrúi ríkisstjórnarinnar, vildi ekki staðfesta við Vísi hvort ráðherrarnir væru látnir skilja síma sína eftir fyrir fundi.

„Því er háttað þannig að menn ræða ekki öryggismál, því þá hætta þau að skipta máli, segir Sigurður Már, en segir öryggismálin alltaf til endurskoðunar. „Breytt tækni er eitt af þeim atriðum sem hafa þarf í huga þegar metnir eru öryggisþættir hverju sinni í kringum ríkisstjórnina.“

Þá herma heimildir RÚV að ráðherrum hafi verið ráðlagt að ræða almennt ekki trúnaðarmál í farsíma, og að rætt hafi verið um að banna fólki að taka síma inn á fundi með ráðherrum.