Gaf brjóst á milli skota

„Þetta er fyrsti sjónvarpsþátturinn sem ég tek þátt í, á eftir Íslandi í dag,“ segir sjónvarpskonan Sigríður Elva Vilhjálmsdóttir en þáttur hennar, Á fullu gazi er frumsýndur í kvöld á Stöð 2. Finnur Thorlacius hefur umsjón með þættinum, ásamt Sigríði Elvu.

Í þáttunum fengu Sigríður Elva og Finnur meðal annars að keyra flotta bíla líkt og Porsche Cayenne, Range Rover Evoque og Tesla rafmagnsbíl.

„Það er erfitt að fara af svona bíl eins og Range Rover og yfir á litla Toyota Aygo bílinn minn.“

Farið er yfir víðan völl í þáttunum og tekið á ýmsu sem tengist bílum og tækni.

„Við förum í keppni um að búa til besta útilegubílinn, fengum bílhræ frá Vöku og fengum tvo sólarhringa til að gera það að sem bestum útilegubíl,“ útskýrir Sigríður Elva.

Auk þess að búa til útilegubíl fer fram rallýkeppni, þar sem fræga fólkið keppir.

„Það var mjög skemmtilegt en fólk blótar ómeðvitað svolítið mikið þegar það keyrir rallýbrautina,“ bætir Sigríður Elva við.

Á meðal þátttakenda í rallýkeppninni eru Ásdís Rán Gunnarsdóttir fyrirsæta, Fjölnir Geir Bragason húðflúrari, Guðlaugur Þór Þórðarson alþingismaður, Saga Garðarsdóttir leikkona og margir fleiri.

„Svo heimsækjum við líka fólk sem á áhugaverða bíla, prufukeyrum þá og skoðum þá hátt og lágt.“ 

Lítið af óhöppum áttu sér stað við gerð þáttanna. „Þetta fór allt saman vel fram. Það var þó einhver smá sprenging sem heppnaðist svo vel að löggan kom á staðinn en engin slys urðu á fólki.“

Sigríður Elva er nýbökuð móðir en hún eignaðist dóttur í lok apríl með unnusta sínum Teit Þorkelssyni. „Ég ætlaði nú aldrei að eignast börn en það hefur svo sannarlega breyst, ég elska móðurhlutverkið, það er best í heimi,“ segir Sigríður Elva.

Litla telpan fékk að vera á setti ansi mikið en Sigríður Elva var með hana á brjósti við tökur.

„Ætli það hafi ekki verið mesta vesenið að hafa krakka á kantinum. Ég þurfti að gefa henni að drekka á milli skota og svo skiptust Kalli pródúser og Finnur á að passa hana. Hún á pottþétt eftir að verða tækjastelpa því hún brosti ávallt mikið þegar hún sá torfærubílana og öll tryllitækin,“ bætir Sigríður Elva við létt í lundu. 

Sjálf segist hún vera ágætlega mikil bílaáhugamanneskja en segist þó ekki vera bílanörd.

„Ég hef gaman af öllu sem fer hratt og er vélknúið en finnst samt Formúla 1 vera rosalega leiðinlegt sjónvarpsefni.“

Þegar að tökum líkur á þáttunum hyggst Sigríður Elva fara í ferðlag með fjölskyldu sinni.

„Mig langar að komast í sól því ég eyddi fæðingarorlofinu mínu í versta sumri Íslandssögunnar,“ segir Sigríður Elva.

Á fullu gazi er á dagskrá Stöðvar 2 klukkan 20.10 á þriðjudagskvöldum. Alls verða sýndir átta þættir.