Öldurnar í Landeyjahöfn festar á filmu

Herjólfur hefur ekki siglt frá Landeyjahöfn til Vestmannaeyja síðan 9. desember. Myndband, sem Guðmundur Alfreðsson áhugaflugmaður tók úr vél sinni í gær, sýnir aðstæður í Landeyjahöfn í gær.

„Ég fer þarna nokkuð reglulega. Ég á flugvél og bíl hinumegin og nota flugvélina þegar ég er að fara upp á land," segir Guðmundur. Hann flýgur yfir einu sinni í viku og hefur gert sér til gamans að taka myndbönd á ljósmyndavél sína.

„Ég var bara ánægður að sjá að garðarnir væru þarna ennþá eftir ölduhæðina á sunnudagskvöldið þegar veðrið var snarvitlaust," segir Guðmundur en ölduhæðin mældist um átta metrar þá um kvöldið.

Ölduhæðin í gær var 3,9 metrar og Guðmundur, sem er vélstjóri, segir ljóst að ekkert skip hefði siglt inn í Landeyjahöfn í slíkri ölduhæð. Herjólfur sigldi á milli Eyja og Þorlákshafnar í gær líkt og undanfarnar átta vikur. Ekki er reiknað með því að Herjólfur sigli í Landeyjahöfn fyrr en í mars eða apríl.

„Það er frábært að hafa höfnina (Landeyjahöfn) þarna. En ég hef ekki patent-lausn til þess að leysa þetta. En það er æðislegt að hafa hana þarna þegar allt er í lagi og skipið kemst yfir," segir Guðmundur.

Önnur myndbönd sem Guðmundur hefur tekið af Landeyjahöfn úr lofti má sjá hér.