Stálu bíl og klesstu tvisvar á

Lögreglan á Akureyri óskar eftir vitnum í tengslum við tvö umferðaróhöpp í morgun.

Samkvæmt upplýsingum frá lögreglu var tilkynnt um bifreið sem hafði verið ekið á mikilli ferð eftir Hlíðarbraut og ekið þar á staur með umferðarskiltum, en staurinn festist undir bifreiðinni og dró hann nokkra vegalengd.

Bíllinn stöðvaðist síðan utan vegar á Þingvallastræti við Miðhúsabraut. Stuttu síðar hlupu lögreglumenn tvo menn uppi í nágrenninu og voru þeir handteknir grunaðir um að hafa verið á umræddum bíl. Annar mannanna var með lítinn hníf í hendinni þegar lögreglumennirnir komu að þeim, en þeir voru báðir í annarlegu ástandi.

Við nánari skoðun reyndist bíllinn vera stolinn og hafði honum einnig verið ekið á ljósastaur í Bugðusíðu skömmu áður - en hún var töluvert skemmd ef ekki ónýtt eftir þann árekstur.

Lögreglan hvetur hvern þann sem hefur einhverjar upplýsingar um málið að hafa samband í síma 464-7700 eða senda póst á netfangið akureyri@logreglan.is.