Ganga í það heilaga 11.12.13 klukkan 14:15

„Tímasetningin var engin tilviljun og þetta var allt útpælt,“ segir séra Sigríður Guðmarsdóttir, sóknarprestur í Grafarvogskirkju. Hún mun í dag gefa saman þau Jónbjörn Valgeirsson og Kolbrúnu Dögg Arnardóttur.

Athöfnin fer fram klukkan 14.15 í dag og er niðurstaðan því skemmtilega talnaröðin 11.12.13.14.15. Séra Sigríður segir þetta ekki í fyrsta skipti sem sóknarbörn hennar velji brúðkaupsdag eftir talnarunum og mætti jafnvel segja að hún sé þaulreynd í þeim efnum.

„Ég gaf saman tvenn hjón 10.10.10 og 12.12.12. Auk þeirra var ég með eina giftingu 11.11.11.,“ segir Sigríður og bætir við að almennt sé mikið að gera hjá prestum á þessum dögum, sérstaklega ef þá ber upp á helgi.

Brúðurin segir daginn vera þýðingarmikinn þar sem árið í ár sé þeirra sextánda ár saman. „Okkur fannst við hæfi að velja þennan dag þar sem við lokum talnarununni,“ segir Kolbrún.

Hjónaefnin eru bæði Reykvíkingar og búa í Grafarholti. Kolbrún segir Hafnarfjarðarkirkju hafa orðið fyrir valinu eftir nokkrar vangaveltur, meðal annars með hliðsjón af veðri.

„Það þurfti að finna kirkju þar sem snjór og slabb myndu ekki setja mikið strik í reikninginn. Fríkirkjan var bókuð þennan dag og strax í vor var ljóst að dagurinn yrði jarðarfarardagur í Dómkirkjunni. Við enduðum á að velja Hafnarfjarðarkirkju og erum mjög ánægð með hana,“ segir Kolbrún.

Það er augljóst að mikil hugsun liggur að baki dagsetningunni sem varð fyrir valinu auk þess sem skipulag þurfti til að finna brúðkaupinu heppilegan stað á þessum árstíma. En hvernig er það að halda brúðkaup í miðri viku?

„Það var ekkert mál. Fólk tók sér að sjálfsögðu bara frí. Við erum búin að hanga svo lengi saman að það eru allir mjög fegnir að við séum loksins að löggilda okkur,“ sagði Kolbrún glöð í bragði þegar Fréttablaðið hafði samband við hana.



Löng bið eftir næstu talnarunu

Nokkuð hefur verið um skemmtilegar dagsetningar fyrir viðburði síðasta áratuginn. Til dæmis má nefna að mikið var um brúðkaup á dagsetningunni 7.9.13. Langt er þangað til sambærileg talnaruna kemur upp og gætu áhugasöm brúðhjón þurft að bíða til 1. febrúar árið 2103 eftir viðlíka talnarunu og er í dag.