Enginn geðlæknir á Litla-Hrauni

Fangar á Litla-Hrauni hafa ekki haft aðgang að geðlækni frá því um miðjan október og bið eftir viðtali við sálfræðing á vegum fangelsismálastofnunar er á bilinu tvær til þrjár vikur.

Formaður og framkvæmdastjóri Geðhjálpar heimsóttu fangelsið og í kjölfarið vilja þeir vekja athygli á að úrbóta er þörf á aðgengi og geðheilbrigðisþjónustu við fanga.

„Vart þarf að hafa mörg orð um nauðsyn þess að fangar hafi aðgang að þjónustu geðlæknis. Hópur brotamanna á við geðrænar raskanir af ýmsum toga að stríða við innritun í fangelsi,“ segir í tilkynningu frá Geðhjálp.

Í nóvember var stofnuð nefnd til að kortleggja geðheilbrigðisþjónustu fanga sem velferðarráðuneytið stýrir. „Ráðuneytið hefur ekki svör á reiðum höndum um það hvernig eigi að bæta geðheilbrigðisþjónustu við fanga en verið er að skoða það í samvinnu þeirra ráðuneyta og stofnana sem koma að þessum málum,“ segir í svari ráðuneytisins við fyrirspurn blaðamanns.