Tíu klukkustunda björgunaraðgerð

Tveir karlmenn og fjögur börn sátu föst í tveimur jeppum við Skjaldbreið í alla nótt. Björgunarsveitarmaður segir litlu hafa munað að snjóbíll björgunarsveitarinnar festist á leið til björgunar.

Tilkynning barst um að tveir bílar sætu fastir við Skjaldbreið um klukkan hálf tíu í gærkvöldi og var björgunarsveitin Tintron úr Grímsnesi kölluð út, Jón Þór Jónsson er einn af þremur björgunarsveitarmönnum sem svöruðu kallinu.

„Það var svolítið óljóst út af því að það var maður þarna uppfrá sem náði ekki í neinn, nema vin sinn sem var á Þorrablóti uppi í Landmannalaugum með öðrum jeppamönnum. Þannig við fáum þær upplýsingar að það séu sennilega tveir bílar fastir einhversstaðar fyrir ofan Vörðu," segir Jón Þór.

Þegar þangað var komið bólaði hins vegar ekkert á bílunum og engin ný hjólför, þeir ákváðu því að snúa við og héldu að bílarnir væru farnir en var snúið við þegar annar ökumanna bílsins komst í símasamband og gat gefið upp staðsetningu sína. Þyrla landhelgisgæslunnar var kölluð út á tíma en henni snúið við vegna slæms skyggnis.

„Við vorum í rauninni bara heppnir, því að við rétt sleppum þarna eftir einn krapapitt, og sitjum þar en náum að moka hann upp, þannig að við komumst af stað aftur," segir hann.

Þeir náðu hins vegar að losa bílana og fylgdu þeim aftur til byggða en samtals tók björgunin um tíu klukkustundir. Jón segir að ágætlega hafi farið um fólkið en fjögur börn voru í bílunum en aðstæður bjóði ekki upp á jeppaferðir á þessu svæði.

„Þegar maður er kominn í vandræði á snjóbíl, þá eru jepparnir enn verri," segir hann.