Númerslausir bílar hrannast upp

Fjöldi númerslausra bíla er íbúum fjölbýlishúsa við Írabakka 2 til 34 þyrnir í augum. Íbúi sem samband hafði við blaðið segir ekkert gerast þrátt fyrir ítrekaða eftirgrennslan hjá borgaryfirvöldum og lögreglu. Bílarnir hafi flestir verið óhreyfðir í stæðum fjölbýlishúsanna síðan í nóvember síðastliðnum og á þá hefur verið límdur viðvörunarmiði frá lögreglu.

Eftirgrennslan blaðsins leiddi í ljós að ekki færri en tíu númerslausir bílar standa í stæðum við fjölbýlishúsið. Íbúi segir málið bagalegt því bílastæðaskortur valdi því að farlama fólk og aðrir sem erfitt eigi um gang fái ekki stæði nálægt upphituðum stéttum við blokkirnar. Á stæðunum myndist svellbunkar sem geti verið afar varasamir.

Samkvæmt upplýsingum frá dráttarbílaþjónustu Vöku eru bílar fjarlægðir eftir ákveðnu verklagi í samvinnu við borgaryfirvöld. Eigendur þeirra fá síðan reikninginn fyrir dráttinn.

Rósa Magnúsdóttir hjá heilbrigðiseftirliti borgarinnar segir að hafi starfsmenn borgarinnar sett miða á bílhræ séu eigendum alla jafna gefnir tíu dagar til að fjarlægja bílinn. Hún geti hins vegar ekki svarað fyrir verklag lögreglu og þekki ekki reglur hennar um drátt bíla sem fengið hafi viðvörun. Heilbrigðiseftirlitið bregðist við umkvörtunum húsfélaga vegna númerslausra bíla.