Umhverfis- og samgöngunefnd fundar um síldardauðann

Síldardauðinn í Kolgrafafirði verður til umfjöllunar í Umhverfis- og samgöngunefnd í dag. Fulltrúar frá Hafrannsóknarstofnun og Umhverfisstofnun munu sitja fundinn. Hátt í fimmtíu þúsund tonn af síld drapst í firðinum, fyrst í desember á síðasta ári og aftur nú í febrúar. Niðurstöður úr rannsóknum Hafró benda til þess að súrefnisskortur hafi verið banamein síldarinnar.

Ólafur Þór Gunnarsson, formaður nefndarinnar, segir að tilgangur fundarins sé fyrst og fremst að fara yfir það sem gerðist í Kolgrafafirði. Í áframhaldi mun nefndin reyna að komast að því hvort að síldardauðinn geti endurtekið sig og hvort að þverun fjarðarins hafi mögulega átt hlut að máli.

„Fyrst og fremst er þetta upplýsingafundur," segir Ólafur Þór. „Þetta er mikið umhverfismál og ýmsar spurningar hafa vaknað. Þar á meðal er nauðsynlegt að ræða þverun Kolgrafafjarðar og hvaða áhrif sú framkvæmd hafið á lífríki fjarðarins."