Ákveðinn hluti hættir sama hvað býðst

Dæmi eru um hjúkrunarfræðinga sem ekki ætla að snúa aftur til starfa á Landspítalanum sama hvað kemur út úr viðleitni til að bæta kjör þeirra.

„Mig langar að vinna hér heima og á Landspítalanum, sem er spennandi vinnustaður. Þar gerast hlutirnir á Íslandi,“ segir Bergþóra Eyjólfsdóttir hjúkrunarfræðingur. Hún er ein þeirra sem sagt hafa upp störfum á spítalanum. Um leið áréttar Bergþóra að hún tali bara fyrir sjálfa sig. Þá viti hún líka líka af nokkrum hjúkrunarfræðingum sem ekki ætla að snúa aftur til starfa við spítalann vegna þess að þeir hafi þegar tryggt sér vinnu annars staðar.

„En ég er spennt yfir þessum fréttum um að spítalinn og ríkið vilji leggja fjármuni í að ná samningum og taka um leið á kynbundnum launamun í landinu,“ segir Bergþóra. Hún kveðst því munu skoða með opnum hug hvað út úr samningunum komi og snúa þá mögulega aftur til starfa við spítalann. „En á móti kemur svo að þegar ég sagði upp þá var ég alveg tilbúin að fara annað að vinna, annaðhvort úti í Noregi eða á öðrum starfsvettvangi,“ bætir hún við. Hún muni því ekki sætta sig við hvað sem er þegar kemur að bættum kjörum við spítalann.