Eðlilegar aðstæður miðað við árstíma

Myndband sem tekið var úr lofti af öldugangi við Landeyjahöfn í síðustu viku vakti töluverða athygli. Forsvarsmenn Siglingastofnunar segja um eðlilegar aðstæður að ræða miðað við árstíma.

Ekki hefur verið siglt á milli Landeyjahafnar og Vestmannaeyja síðan 9. desember. Síðan þá hefur Herjólfur siglt á milli Eyja og Þorlákshafnar eins og skipið gerði áður en Landeyjahöfn var tekin í gagnið í maí 2011.

Upphaflega var gert ráð fyrir því að nýtt og minna skip en Herjólfur myndi flytja farþega á milli Vestmannaeyja og Landeyjahafnar. Kaupum á nýju skipi hefur þó verið frestað um óákveðinn tíma en frestunin er ein afleiðing fjármálahrunsins haustið 2008.

Myndbandið, sem sjá má hér fyrir neðan, vakti upp þá spurningu hvort minna skip ætti erindi sem erfiði í aðstæðum líkt og þeim sem sjást á myndbandinu.

Í svari frá Siglingastofnun segir að aðstæðurnar á myndbandinu séu eðlilegar miðað við árstíma. Ekki sé gert ráð fyrir siglingum í Landeyjahöfn ef ölduhæð fari yfir 3,5 metra. Ölduhæð í Landeyjahöfn var um fjórir metrar daginn sem myndbandið var tekið samkvæmt Eyjafréttum.

Áætlað er að dýpkun í Landeyjahöfn muni hefjast í mars og muni vinda fram eftir því sem aðstæður leyfi. Því má reikna með að a.m.k. fjögurra mánaða hlé verði á siglingum í Landeyjahöfn í ár. Forsvarsmenn Siglingastofnunar segja Herjólf henta illa í aðstæðum í Landeyjahöfn, sérstaklega yfir veturinn.

Sú spurning vaknar hversu oft megi reikna með því að fella þurfi niður ferðir á milli Eyja og Landeyjahafnar með tilkomu nýs og minna skips.

„Farið hefur verið yfir öldugögn frá 2003 til desember 2012. Samkvæmt þeim þá má ætla að jafnaði 10 daga ári falli ferðir niður og í um 30 daga til viðbótar falli að a.m.k. 1 ferð eða fleiri niður."

Því má gera ráð fyrir að röskun verði á siglingum minna skips um 40 daga á ári. Það er þó töluvert minni röskun en orðið hefur í vetur sem verður væntanlega ekki minni en 120 dagar. Þó kemur fram í svari Siglingastofnunar að minna skip gæti einnig siglt til Þorlákshafnar væru aðstæður í Landeyjahöfn erfiðar.