„Við ætlum að lækka skatta“

„Það skiptir svo miklu máli að fá ný störf. Ekki bara fyrir hagsæld heimilanna heldur líka fyrir ríkissjóð," sagði Bjarni Benediktsson formaður Sjálfstæðisflokksins í samtali við Reykjavík síðdegis í dag.

Bjarni gagnrýndi ríkisstjórnina harðlega og sagði of langt hafa verið gengið í skattahækkunum. „Þessi ríkisstjórn hefur gengið allt of langt í að hækka skatta, álögur og gjöld, bæði á fyrirtæki og almenning.

Þá segir Bjarni að forgangsröðun ríkisstjórnarinnar hafi verið kolröng. „Bæði hafa menn verið að verja háum fjárhæðum í verkefni sem hafa ekki verið til þess fallin að auka hagsæld hér í þessu þjóðfélagi, og síðan hafa menn líka verið að þvælast fyrir málum sem virka í þá átt."

Bjarni segir mikilvægast að skapa ný störf og segir fimm þúsund ný störf geta bætt stöðu ríkissjóðs um tuttugu milljarða.

„Þess vegna höfum við í Sjálfstæðisflokknum allt þetta kjörtímabil verið að hamra á mikilvægi þess að hérna yrði hagvöxtur, kæmu ný störf, fjárfestingar, menn létu af árásum á sjávarútveginn, væru með skynsama orkunýtingarstefnu og væru ekki að þvælast fyrir ferðaþjónustunni í landinu."

Bjarni segir nauðsynlegt að koma til móts við þarfir heimilanna í gegnum skattkerfið og að bæta verði stöðu fyrirtækjanna í landinu svo hægt sé að gera betur við launamenn.

„Og já, við ætlum að lækka skatta. Við trúum því að það sé ein af aðgerðunum sem þarf að grípa til til þess að auka umsvif og örva hagkerfið."