Hlakkar til að faðma dætur sínar

Guðmundur Felix Grétarsson er til umfjöllunar á vefsíðu fréttastofunnar Reuters, en hann bíður nú eftir að komast í handaágræðslu í Frakklandi.

Í myndbandi Reuters er talað við lækni Guðmundar, en hann segir aðgerðina afar sérstaka, en aldrei áður hefur maður fengið grædda á sig tvo handleggi.

Guðmundur, sem missti handleggina fyrir fimmtán árum síðan í vinnuslysi, segist vonast til þess að geta klætt sig sjálfur, þrifið sig án hjálpar og faðmað dætur sínar. "Allt þetta litla sem fólk hugsar lítið um því það þykir svo sjálfsagt," segir Guðmundur, sem nú bíður eftir hentugum gjafa.

Myndbandið má sjá á vefsíðu Reuters.