Nóg um að vera á Sjómannadegi

Fjölbreytt dagskrá verður um allan bæ í tilefni Sjómannadagsins í dag. Hátíðarhöldin eru einstaklega vegleg í þetta sinn, þar sem einnig er haldið upp á 75 ára afmæli Sjómannadagsins í ár. Þá eru heil 100 ár síðan framkvæmdir hófust við höfnina í Reykjavík.

Hátíð hafsins hófst í gær á Hafnardegi, þar sem mikill fjöldi fólks gerði sér glaðan dag við höfnina í Reykjavík. Dagskráin heldur áfram í dag, en við bætist sérstök hátíðardagskrá þar sem sjómenn verða heiðraðir fyrir störf sín. Klukkan 12.30 leiddu Skoppa og Skríta og Maxímús Músíkús sjómannadags- skrúðgöngu fyrir börnin frá Hörpu ásamt lúðrasveit.

Skrúðgangan endaði úti á Granda þar sem hátíðardagskrá fer nú fram. Róðrakeppni, björgun úr sjó og sjávartívólíið Bryggjusprell eru meðal dagskrárliða. Nánari upplýsingar um dagskrána má finna hér.

Dagmar Haraldsdóttir, framkvæmdarstjóri Hátíðar hafsins, segir mikilvægt að halda utan um þann menningararf sem sjómannadagurinn geymir. „Sjómannadagurinn er stór hluti af okkar menningu. Reykjavík væri ekki þessi borg sem hún er í dag ef að höfnin hefði ekki verið byggð. Við leggjum áherslu á þetta með því að tengja allar uppákomur, tónlist og veitingar við hafið og menningu þess. Það er mikilvægt að börnin okkar að átta sig á því hvað þetta er stór hluti af okkar samfélagi.“

Fjölbreytt dagskrá verður um land allt í tilefni dagsins.