Ný ljósmyndakeppni byrjar í dag

Útivist er annað þemað í ljósmyndakeppni Fréttablaðsins sem hefst í dag.

Valdar verða bestu myndirnar frá sumrinu og haustinu í þremur flokkum og var náttúran þema fyrstu keppninnar. Úrslit úr henni voru kunngjörð á laugardag en myndin Tófan og marhnúturinn bar sigur úr býtum. Í verðlaun fyrir bestu myndina er glæsileg Nikon 10,1 milljóna pixla myndavél með 10-27 mm linsu.

Þátttakendur hlaða upp myndum sínum á ljosmyndakeppni.visir.is. Innsendar myndir birtast á Vísi og lesendur geta kosið bestu myndina. Niðurstaðan í kosningunni gildir helming á móti áliti dómnefndar blaðsins. Bestu myndirnar verða síðan einnig birtar í Fréttablaðinu.

Hver þátttakandi skal senda inn eina mynd og skal hún hafa verið tekin nú í sumar eða haust. Óheimilt er að senda inn eða eigna sér ljósmyndir sem aðrir en sendandi hafa tekið. Myndinni þarf að fylgja nafn höfundar og upplýsingar um heimilisfang, netfang og símanúmer.

Annar hluti keppninnar stendur frá deginum í dag, 23. september, fram að miðnætti miðvikudaginn 2. október. Tilkynnt verður um úrslit í helgarblaði Fréttablaðsins og hér á Vísi laugardaginn 6. október.

Hægt er að skoða og kjósa innsendar myndir og fá nánari upplýsingar um keppnina á ljosmyndakeppni.visir.is.