Ritstjóri Júlíu rekinn

Síðasta tölublað Júlíu undir ritstjórn Halldóru Önnu Hagalín lítur dagsins ljós í næstu viku. Hún hefur látið af störfum eftir að hafa verið sagt upp fyrr í haust en miklar mannabreytingar og uppsagnir hafa verið hjá útgáfufélaginu Birtíngi síðustu misseri.

Horfir björtum augum fram á við

„Framundan er smá afslöppun og í raun það sumarfrí sem ég hef ekki komist í síðustu misseri. Eftir mörg ár hjá sama fyrirtæki er líka tilhlökkun hjá mér að prófa eitthvað nýtt. Ég hef komið víða að innan Birtíngs og á eftir að sakna samstarfsfólksins gríðarlega, enda er þetta eiginlega hin fjölskyldan mín. Það mætti í raun segja að ég sé að ganga í gegnum ákveðið breytingarskeið þar sem ég er að koma mér fyrir á nýju heimili, er í dag að hætta í starfi sem ég hef verið lengi í og svo á ég líka afmæli á sunnudaginn. Ég trúi að framtíðin beri eitthvað frábært í skauti sér, hvað það er veit ég ekki ennþá en hlakka til að komast að því,“ segir Halldóra Anna.

Halldóra hefur starfað síðustu sjö ár hjá félaginu og komið að ýmsum störfum þar innhúss. Eftir að hafa byrjað þar í markaðsstjórn sneri hún sér að ritstörfum fyrir nokkrum árum og hefur hún verið ritstjóri Júlíu frá upphafi meðfram ýmsum öðrum störfum.