Heildarlaun kvenna ná ekki 300 þúsund að meðaltali

Launahækkunartillögur Samtaka atvinnulífsins ganga ekki út á að hækka laun þeirra lægst launuðu, segir Drífa Snælda framkvæmdastjóri Starfsgreinasambands Íslands.

Í tilkynningu frá henni segir hún að margir eigi erfitt með að ímynda sér að fólk lifi af minna en 300 þúsund krónur í mánaðarlaun. Ráðherrar, atvinnurekendur og fleiri eiga skiljanlega erfitt með að setja sig í þau spor.

Drífa segir að á hverjum degi eigi Starfsgreinasambandið í samskiptum við fólk sem lifa af mánaðarlaunum undir 300 þúsund krónum.

„Í nýútkominni könnun sem Flóabandalagið lét gera meðal félaga sinna kemur í ljós að karlar eru með að meðaltali 298.000 krónur í dagvinnulaun en konur eru með að meðaltali 255.000 krónur í dagvinnulaun,“ segir hún.

„Við þessar upphæðir bætast greiðslur svo sem vaktaálag, bónusar og yfirvinna en þrátt fyrir það ná heildarlaun kvenna ekki 300.000 krónum að meðaltali. Heildarlaun karlanna fer hins vegar í 414.000 krónur að meðaltali. 40% fólks sem hefur ekki formlega menntun á vinnumarkaði er með heildarlaun undir 300.000 krónum. Þetta er veruleiki verkafólks á Íslandi hvort sem yfirvöld og samningsaðilar trúa því eða ekki," segir Drífa. 

Pistil Drífu má lesa hér.